याबरोबर स्वतःचे संघर्ष पण चालू असतात. नोकरीमध्ये पगार हा कधीच समाधानाचा नसतो. प्रत्येकाला वाटतं आपल्या कष्टाचं इथे चीज होत नाही..अजून हवं . सासू सुनेच्या वादात पण हे अजून हवं चाच रोल असतो. नेमकं काय हवं असतं आपल्याला?आपण आपल्याच अपेक्षा आपल्याकडून किती वाढवून ठेवतो? जगण्याची ऊर्जा " अजून हवं " यातून मिळते हे जरी मान्य केलं तरीही " चित्ती असो द्यावे समाधान " असं संतांनी का सांगितलं असेल याचा आपण विचार करतो का?

जगण्यातला चिवटपणा हा या "अजून हवं " मुळे टिकून राहतो. " मला आता काही नको" असा म्हणणारा विरळाच. ते जिवंतपणाचं लक्षण मानू या का? पण यातून आणखी उत्साहाने काम करण्याची ऊर्जा मिळत असेल तर ते योग्य पण त्यामुळे मोह-मत्सर हे दुर्गुण येणार असतील तर आयुष्यात नकारात्मकता जास्त येते . आणि मग वर्तमानातील आनंद उपभोगू नाही शकत आपण.