श्रीकृष्ण तिचा सखा, मार्गदर्शक होता. परंतु त्याचं दैवी रूप ठाऊक असलेली द्रौपदी अपमानित होत असताना कृष्णाचा परमेश्वर म्हणून धावा करते आणि तो भरसभेत तिची लाज राखतो. अज्ञातवासात असताना "तुझ्यावर अन्नपूर्णा कायम प्रसन्न राहील" असा वर देतो. त्यामुळे अनेक कठीण परिस्थितीत द्रौपदी गृहिणी पद उत्तम सांभाळते. "स्वतःला पणाला लावले असताना मला पणाला लावू शकत नाहीस" असे युधिष्ठिराला ठणकावून सांगून सभेतील ज्येष्ठ व्यक्तींना देखील ठामपणे प्रश्न करणारी द्रौपदी अत्यंत तेजस्वी आहे. प्रातः स्मरणीय आहे. युधिष्ठिराबरोबर तर्कशुध्दतेने चर्चा करणारी, भीमाचा राग कायम प्रज्वलित ठेवणारी, नकुल सहदेवाचा सांभाळ करणारी अशा अनेक छटा असणाऱ्या स्त्रीचं पात्र व्यासांनी रंगवलं आहे.