एकमेकांशी वाद-संवाद-विसंवाद जो आहे तो प्रकर्षाने जाणवून देणारा हा काळ. एरवी जगरहाटीमध्ये झाकलेले गुण -दोष अचानक एकमेकांसमोर आले. आणि सगळ्या गोष्टींमध्ये हरवलेला माणूस माणसालाच शोधायला लागला. जे कुटुंब एकत्र येऊ शकलं ते नशीबवान ठरलं . पण जगाच्या पाठीवर असलेले अनेक जण एकमेकांच्या सहवासासाठी आतुरले एरवी दैवी शक्तीला गृहीत धरलेले आपण दिवसातून एकदा तरी देवासमोर हात जोडायला लागलो.

मनाचे व्यापार अनंत. प्रत्येकाचं अथांग आभाळ. त्या आभाळात मुक्त संचार करायला मिळण्याचा हा काळ. हाताला जसं काम पाहिजे तसंच मन आणि मेंदूला खाद्य पाहिजेच असा वाटायला लावणारा हा काळ. एक स्वल्पविराम घेण्याचा हा काळ. प्रचंड सामाजिक, आर्थिक आणि वैश्विक उलाढाल घडण्याचा हा काळ.